ဆားကိုင်သူများ


(တစ်) ကိုရင် ဥာဏ

၂၀၁၅ အိပ်မက်အတွက် ခရီးတစ်ခု ထပ်ထွက်ဖို့ ကိုရင်ဥာဏ ပြင်ဆင်နေမိသည်။ သူ ဘာတွေလုပ်နေတယ်ဆိုတာကို ခပ်ပါးပါးသဘောပေါက်တာကလွဲလို့ မျှော်လင့်ချက် လေးလေးလံလံ ရှိမနေဖို့လည်း သူ့ကိုယ်သူ ထိန်းကွပ်ထားလိုက်သည်။ အမှန်တော့ ၂၀၁၄ သည် သူ့အတွက် နှစ်ကောင်းနှစ်မြတ်ဖြစ်သည်။ သူ့ကျိုးစားမှုအတွက် ကျိုးစားခ ၆၃ သိန်းခန့် ရရှိသည်။ ထိုပမာဏက သူ့ဖခင် လူ့ဘ၀မှာ နေထိုင်သွားရသည့် နှစ် အရေအတွက်နဲ့ တိုက်ဆိုင်နေလေသည်။
ထို့ကြောင့် ဖခင်အတွက် ၂၀၁၄ လက်ကျန်စာရင်းရှင်းလှူဒါန်းလိုက်ပြီး ပိုင်ဆိုင်မှု သုညဖြင့် ခရီးတစ်ခု ထပ်ထွက်ဖို့ ပြင်ဆင်နေခြင်းဖြစ်သည်။ ကိုရင်ဥာဏ ပေါ့ပါးနေသည်။

(နှစ်) ကိုရင်ဝါသ၀

သူ့မှာ ရင်ဖွင့်ပေါင်းလို့ရသည့် ကိုရင်ဝါသ၀လည်း ရှိသည်။ ကိုရင်ဝါသ၀ မှာ ဆောက်လက်စ သုံးထပ်ကျောင်းဆောင်ရှိသည်။ ပိုက်ဆံမရှိဘဲ ဆောက်လုပ်ချင်သည့် ငါးထပ်ကျောင်းဆောင်လည်း ရှိနေဟန်တူသည်။
သို့သော် ကိုရင်ဝါသ၀ကိုယ်တိုင်ကလည်း လေးလေးလံလံကြီး မဟုတ်၊ ပေါ့ပေါ့ပါးပါးဖြင့် သူယုံကြည်ရာ သူလုပ်နေတတ်သည်။
"ဒီခေတ်မှာ လေယာဉ်စီးပြီး ခရီးသွားရတယ်ဆိုကတည်းက သေခြင်းတရားနဲ့ သူသေကိုယ်သေ တိုက်ခိုက်နေရတာ၊ တကယ်လို့များ၊ တစ်ခုခုဆိုရင်......"
သူ့ကျောင်း သူ့မြေ သူစာချုပ်တွေကို သေတန်းစာနဲ့အတူ ကျန်နေရစ်ခဲ့သူတွေထံ လွှဲပြောင်းပေးထားတတ်လေသည်။
လည်ပင်းမှာ ပိုင်ဆိုင်မှုတွေ ချိတ်ဆွဲမထားသည့်အတွက် ကိုရင်ဝါသ၀လည်း ပေါ့ပါးနေတတ်သည်။

(သုံး)

ရေပေါ်မှာ ရေဖော့ထားတတ်လျင် ရေဘယ်လောက်နစ်သလဲဆိုတာသည် အရေးမကြီးလှပါ။
လက်ညှိုးမှာ ဒဏ်ရာမရှိလျင် ဆားကိုကိုင်သော်လည်း မစပ် ဟု ဘုရားရှင် မိန့်မှာခဲ့ဖူးသည်။
၂၁ ရာစုထဲမှာ ဆားကိုင်တတ်ဖို့ ကျွနုပ်တို့ လေ့လာရပါဦးမည်။

သီဟနာဒ

Post a Comment