အရှေ့တောင်အာရှက ကျူပီအာများ


အိပ်ရေးတစ်ညလုံးပျက်တာတောင် သတင်းစာလာတော့ မြန်မာ့သတင်းနဲ့ အားကစားစာမျက်နှာဆီ မျက်စေ့ရောက်သွားတယ်။ ကိုယ့်နိုင်ငံရဲ့ သတင်း ကလည်း အခုတလော " No news is good news " ဖြစ်နေတာကိုး။ စထရိတ်တိုင်းမ် သတင်းထောက်ကတော့ ဦးဝီရသူ လေသံပြောင်းသွားပြီ လို့ ခေါင်းစည်းတင် ရေးထားတယ်။ ဒါပေမဲ့ အခု ပြောချင်တာက အဲ့ဒီကိစ္စ မဟုတ်ပါဘူး။ တစ်နှစ်လုံး ဇယားအောက်ဆုံးမှာနေခဲ့တဲ့ ကျူပီအာက ဇယား မှာ တစ်ဆင့်တက်သွားတဲ့ ကိစ္စပါ။ အိပ်ချင်စိတ် နည်းနည်းပြေသွားတယ် ။ ခေတ် စကားနဲ့ ဘိုကြီးလဲပေါ့။ အဲ ရေးချင်တာက ဘောလုံးကိစ္စလည်း မဟုတ်ပြန်ဘူး။

ကျူပီအာ ဇယားမှာ တစ်ဆင့်တက်သွားပုံ။ နိုင်သွားလို့များလား အောက်မေ့ တယ်။ မဟုတ်ရှာဘူး။ ဒီအသင်းက ဒီတပတ်ပွဲစဉ် မကန်ရသေးတော့ အရှုံး မရှိ၊ အနိုင်မရှိ၊ သရေမရှိ။ ဒါပေမဲ့ တစ်ဆင့်တက်သွားတယ်။ သူတော်လို့ မ ဟုတ်ဘူး၊ သူ့အထက်က Reading ရှုံးသွားလို့။
ပြုံးမိတယ်။

စင်္ကာပူကနေထိုင်ပြီး ကိုယ့်နိုင်ငံအပေါ် ကျော်တက်သွားတယ်ဆိုတဲ့ အရှေ့တောင်အာရှ နိုင်ငံတွေကို ကြည့်မိတယ်။ စင်္ကာပူကလွဲရင် အားလုံး ကျူပီအာတွေချည်းပဲ။ ထိုင်း၊ အင်ဒို၊ မလေး၊ ဖိလစ်ပိုင် စတာတွေ ပေါ့။ ထိုင်းကိုကြည့်၊ ကမ္ဘာစစ်ဒဏ်မခံရ၊ ကိုလိုနီလုပ်မခံရနဲ့ လုံးခြာလိုက်နေလိုက် တာ တခါတခါ လေယာဉ်ပျံတောင် ဆင်းလို့မရဘူး။
အင်ဒိုလား။ ဆူဟာတိုရှိတုန်းက တစ်ယောက်ကို လာဘ်ထိုးလိုက်ရင် ပြီးပြီ၊ အခု ဘယ့်သူ့ကိုလာဘ်ထိုးရမှန်းမသိလို့ လူတကာကိုပေးနေရသတဲ့။ မလေးကြည့်အုံး။ တရုတ်၊ ကုလားစည်းပွားရေးဖယ်လိုက်ရင် စားအုန်းဆီ ခြံတွေနဲ့ လုံးခြာလိုက်နေတုန်း။ မြို့ကြီးသား ပီသဖိုဆိုတာ ခဏထားပါအုံး။

စင်္ကာပူကတော့ ကိုလိုနီစနစ်လက်ကျန် ပညာရေးစတာတွေရယ်၊ လီကွမ်းယု သံလက်သီးရယ်ကြောင့် လုံးဝ ပုံစံကျနေတယ်။ ရှေ့က ပြေးနေလိမ့်ဦးမယ်။
အဲဒါ ပြောတာ။ ကျန်တဲ့နိုင်ငံတွေက တော်လို့မဟုတ်ဘဲ ကိုယ်ကကို မစွံလွန်း မက မစွံလွန်းလို့ ကျန်ခဲ့ရတာ။ သူတို့ဆီတွေ ရောက်ခဲ့ဖူးတယ်၊
အထင်ကြီးလေးစားစရာ၊ အတုခိုးစရာရယ်လို့ကို ( ကိုယ် ညံ့လို့လည်း ဖြစ်မယ် ) မတွေ့ မိဘူး။
ဘာဖြစ်ဖြစ် နိုင်ငံအလိုက် ကြည့်ရင်တော့ စင်္ကာပူကလွဲရင် အားလုံး ကျူပီ အာတွေချည်းပဲ။ လိုက်လို့ ရကိုရတယ်။
အဲ..... အချင်းချင်း အိမ်မီးရှို့တမ်း ကစား မနေကြရဘူးဆိုရင်ပေါ့။



 ဇင်ဝေသော်

Post a Comment