(၇ - လပြည့်) အမှတ်တရ
သမိုင်းသစ်တစ်ခုကို ရေးဖို့ အရေခွံတွေ တစ်လှပ်ချင်း ခွာချလာနေတဲ့ မြို့တော်ဆီကို (၇) နှစ်အတွင်း တစ်ခေါက် ပြန်ရောက်ခဲ့တယ်။ ရက်စက်တဲ့ မေ နွေရဲ့အပူက (၃၈) နဲ့ (၄၂) ကြားမှာ လူးလားခေါက်ပြန်။ လေသံမပြောင်းသေးတဲ့ အညာရဲ့ ခြောက်သွေ့မှုက နေ့တာတွေကို ဆွဲဆန့်နေတော့တယ်။ ပူလှချည့်။
ရန်ကုန်ပြန်ရောက်တုန်း (၁၀) နှစ်ကျော်ကာလက အတူ ရေးခဲ့၊ ငြင်းခုံခဲ့ဖူးတဲ့ ကဗျာဆရာဆီကို အလည် ရောက်သွားမိတယ်။ သူယူထားတဲ့ မိန်းမနဲ့ သူ့သားလေးကို မြင်ဖူးချင်တာလည်း ပါပါတယ်။ ကဗျာဆရာက သူ့အိမ်ရှေ့မှာ ကလေးတွေအတွက် ဂိမ်းဆိုင်လေး ဖွင့်ထားတယ်။ ကျနော်တို့ စကားပြောနေစဉ်မှာပဲ ဂိမ်းဆော့နေတဲ့ ကလေးတစ်ယောက်ဆီက အလိုမကျတဲ့ အသံတစ်ခု လွင့်ထွက်လာတယ်။
“ေ-ာက်ကားက မှောက်ပဲ မှောက်နေတယ်”
အံ့ဩသွားတဲ့ ကျနော့်ကို ကဗျာဆရာက
အံ့ဩသွားတဲ့ ကျနော့်ကို ကဗျာဆရာက
“မင်း အံ့ဩနေသလား၊ မအံ့ဩနဲ့ဦး၊ ငါ့သား ပြန်လာအောင် စောင့်ဦး” ဆိုပြီး သူ့အမေနဲ့အတူ ရှမ်းခေါက်ဆွဲ သွားဝယ်တဲ့ (သုံးနှစ်သား) သူ့သားကို စောင့်ဖို့ပြောလို့ အံ့ဩတာတောင် နှာဖာကြိုး အဆွဲခံလိုက်သလို တုန့်ခနဲ ဖြစ်သွားရတယ်။ မကြာပါဘူး၊ သူ့သားလေး ရောက်လာတယ်။ သူ့ပါးစပ်ကလည်း စကားလုံးတွေ တစ်သီတစ်တန်းကြီး ရွတ်လို့ …
“ဦး ….. (သူ့အဖေနာမည်) မနေ့က တစ်နေ့လုံး အိမ်မပြန်ဘူး။ သူ့စော်ဆီကို သွားတယ်။ ဦး (…..) က သောက်ရမ်း လန်းတယ်” တဲ့။
သုံးနှစ်သားလေးက ဒါမျိုးတွေ ပြောတတ်နေလို့ အူတက်မတတ် ရယ်ခဲ့ရတယ်။ ကဗျာဆရာ ရှင်းပြတာက သူ့သားလေးဟာ ဂိမ်းကစားတဲ့ ဆယ်ကျော်သက် ကလေးတွေဆီကနေ အဲ့သလို စကားလုံးတွေ ကြားရင်း တတ်လာတာတဲ့။ ဟုတ်မယ်။ သူပြောနေတဲ့ ဝေါဟာရတွေက သုံးနှစ်သားလေးနဲ့ လုံးဝ မဆိုင်ဘူး။
ကလေးကို မုန့်ဖိုးပေးပြီး အမှတ်တရ ဓာတ်ပုံရိုက်လိုက်တယ်။
ကင်မရာထဲမှာ ပါတဲ့ ရေသူမပုံကို ဒီကောင်လေးက ဘယ်လို တွေ့မှန်းမသိ တွေ့သွားတယ်။ ဒါနဲ့ အဲ့ဒီပုံကို ပြရင်း ဒါ ဘယ်သူ့ပုံလည်းလို့ သူ့ကို မေးကြည့်တော့ သူက
“အဲ့ဒါ… ဦးစော်လေ” တဲ့။
“လန်းတယ်၊ လန်းတယ်၊ ဦးစော်က သောက်ရမ်း လန်းတယ်” တဲ့။
ရီလိုက်ရမလား၊ ငိုလိုက်ရမလားကို မသိတော့ပါဘူး။
ကဲ … ထားပါတော့ မင်းမြတ်ကိုကိုရယ်။ “စော်” တွေ “လန်း” တွေကို မင်းပြောတတ်ပေမယ့် “ရေသူမ” ဆိုတဲ့ ဝေါဟာရကိုတော့ မင်း နားမလည်နိုင်သေးပါဘူး။ ဒါနဲ့ပဲ မင်းပုံလေးကို အမှတ်တရ ဦးဘလော့ဂ်ပေါ် တင်ပေးလိုက်ပါတယ်။
ရေရေလည်လည် လန်းတယ်။
ဇင်ဝေသော်
Copyright © 2012 ကမ်းလက်. All rights reserved.
Post a Comment