လိုကောလိုအပ်ရဲ့လား ကာချုပ်ကြီးရယ်


စစ်မှု မထမ်းမနေရ ဥပဒေမျိုး ပေါ်ပေါက်လာနိုင်တယ် ဆိုတဲ့ စကားနဲ့စပ်ပြီး အဲသလို မေးချင်တာပါ။ (ဒီသတင်း မမှန်ဘူးဆိုရင် ကာချုပ်ကြီးကိုရော စာဖတ်ပရိသတ်ကြီးကိုပါ တောင်းပန်ပါတယ်)။ စစ်မှု မထမ်းမနေရ ဆိုလိုက်တာနဲ့ မျက်စေ့ထဲ တန်းရောက်လာတာက အစ္စရေး၊ စင်္ကာပူ။ သူတို့မှာ တူညီတဲ့ ကံကြမ္မာတွေလည်း ရှိကြရဲ့။

၁။ နှစ်နိုင်ငံစလုံးက လူဦးရေအရရော နယ်မြေအားဖြင့်ပါ ပိစိကွေးလေးတွေ။
၂။ နှစ်နိုင်ငံစလုံးရဲ့ဘေးမှာ လူဦးရေ များလွန်းလှတဲ့ မွတ်စလင် နိုင်ငံကြီးတွေ ရှိနေတယ်။
၃။ အစ္စရေးက အနောက်ဆရာကြီးတွေကောင်းမှုနဲ့ အိမ်နီးချင်းတွေ လုံးဝ သဘောမတူတဲ့ကြားကနေ နိုင်ငံအသစ် ပေါ်လာတာ (နိုင်ငံအသစ် တဖန် ပေါ်လာ) တာဖြစ်ပြီး စင်္ကာပူရဲ့အရေးမှာလည်း ဗြိတိသျှအကူအညီ မကင်းခဲ့ဘူး။

ကျနော်တို့နိုင်ငံက ဘင်္ဂလားဒေ့ရ်ှနဲ့ အိမ်နီးချင်း ဖြစ်နေတာကလွဲရင် အထက်ပါအချက်တွေနဲ့ လုံးဝ မကိုက်ညီဘူး။ တရုတ်၊ အိန္ဒိယနဲ့ ကျနော်တို့က အခန့်မသင့်တာလေးတွေ ရှိခဲ့ဖူးတယ် ဆိုတာကလွဲရင် သူသေကိုယ်သေ ဆော်ရမယ့် သမိုင်းဝင်ရန်ညှိုးတွေ (ဟို နှစ်နိုင်ငံလို) မကြီးလှ၊ မရှိလှပါဘူး။ တရုတ်ကလည်း နှပ်ချေးဗရဗွလေးမို့ ခေါင်းခေါက်နေတာကလွဲရင် မြန်မာနဲ့ ၂၁ ရာစု စစ်ပွဲ ဆင်ဖို့လောက်အထိ စိတ်မင်စားပါဘူး။ မျက်နှာ အကျအန သစ်၊ ဝတ်ကောင်းစားလှလေးနဲ့ဆို သူလည်း ခေါင်းမခေါက်ရဲလောက်ပါဘူး။

ဘာပဲဖြစ်ဖြစ် "တပ်မတော်အင်အားရှိမှ တိုင်းပြည်အင်အားရှိမယ်" ဆိုတာကို ကျနော်တို့ အပြည့်အဝ လက်ခံပါတယ်။ ဒါပေမဲ့ စဉ်းစားကြည့်သင့်တဲ့ အဖြေက စစ်မှု မထမ်းမနေရ ဥပဒေမျိုး ပေါ်ပေါက်လာရေးမဟုတ်ဘဲ လက်ရှိ စစ်သားတွေကို စွမ်းရည်မြှင့်တင်ပေးရေးလို့ ထင်ပါတယ်။ အရေအတွက်အရ သိပ်မနည်းလှပါဘူး။



အဲဒီ ဥပဒေမျိုးသာ တကယ်ကြီး ပေါ်ပေါက်လာရင် နောက်ကျသွားမယ့် လူငယ်လေးတွေရဲ့ ပညာရေး၊ စီးပွားရေးကိုလည်း ထည့်စဉ်းစားရပါမယ်။ စင်္ကာပူမှာ စစ်မှု မထမ်းရဘူးဆိုတော့ မိန်းကလေးတွေက ကောင်းကလေးတွေထက် နှစ်နှစ် အချိန်စောရကြတယ်။ သူတို့ ပညာရေး၊ စီးပွားရေးက အခြေကျနေပြီဆိုတော့ ဒါက ပြသနာကြီး မဟုတ်လှဘူး။

အစစ နောက်ကောက်ကျခဲ့ရပြီ၊ တံခါးဖွင့်လာတဲ့ အစိုးရအသစ်လက်ထက်မှာ ကမ္ဘာ့ရေစီးထဲ သူများထက်မြန်အောင် ပြေးဝင်ချလိုက်မဟဲ့ ဆိုတဲ့ ကျနော်တို့ ကျောင်းသား၊ လူငယ်လေးတွေရဲ့ ပညာရေး၊ စီးပွားရေး အိပ်မက်ကို (အဲဒီ ဥပဒေကြီးက) ဇက်ကြိုးကနေ ဆောင့်ဆွဲလိုက်သလို ဖြစ်မသွားလောက်ဘူးလား။

ကျနော် မှားကောင်း မှားမယ်၊ ကျနော် ထင်တာကတော့ ဒီ ဥပဒေဟာ ဖြစ်လာမယ် မဟုတ်ဘူး။ ဒါပေမဲ့ ရွေးကောက်ပွဲအတွက် အပြင်းအထန် စည်းရုံးနေကြတဲ့ ကာလမှာ ကာချုပ်ကြီးကလည်း မသိမသာ စည်းရုံးရေး ဆင်းလိုက်တာလို့ပဲ ယုံကြည်ပါတယ် (ခေတ်လူငယ်တွေ စကားနဲ့ဆိုရင် ဆေးဝင်ထိုးတယ်ပေါ့ဗျာ)။ "တပ်မတော်" "နိုင်ငံတော် ကာကွယ်ရေး" စသည် စသည်ဟာ အလွန်အရေးကြီးတယ် ဆိုတဲ့စကားနဲ့ လူကြီးပီပီ သိမ်သိမ်မွေ့မွေ့လေး ပြည်ခိုင်ဖြိုးအတွက် လုပ်ပေးတဲ့ စည်းရုံးရေးလို့ ယူဆရပါတယ်။ ဘာလို့လဲဆိုတော့ စကားနည်းတဲ့ ကာချုပ်ကြီး ရုတ်တရက် ဒီစကား ကောက်ပြောချလိုက်လို့ပါ။ ဒါမျိုးစကားက လောက်ကိုင်နဲ့ ဖြစ်နေတုန်းက (သို့) အစိုးရသစ် ပေါ်လာမှ ပြောသင့်တဲ့ စကားမျိုး ဖြစ်နေလို့လေ။

"နိုင်ငံတော် ကာကွယ်ရေး" ဟာ သိပ်အရေကြီးပါတယ်၊ ဒါပေမဲ့ စီးပွားရေး လိုကဏ္ဍကလည်း အလားတူပဲ အရေးကြီးပါတယ်။ ဒါကြောင့် ကာကွယ်ရေးဟာ အရေးကြီးတယ်၊ ဒါပေမဲ့ လိုတာထက် ပိုပြီးတော့ အရေးမကြီးပါဘူး။ ဝန်ကြီးဌာနတွေ အများကြီး ထားရှိနေရတာကိုထောက်ရင် "ကာကွယ်ရေးဝန်ကြီးဌာန" ဆိုတာကလည်း အခြား အရေကြီးတဲ့ ဝန်ကြီးဌာနတွေထဲက တစ်ခုပါပဲ၊ လုံးဝ မပိုပါဘူး။

ဇင်ဝေသော်

Post a Comment